Кондак 1

Избранный страстотерпче и исповедниче Христов, священномучениче Феоктисте, Церкви Христовы мудрый наставниче и Слова Божия истинный проповедниче, восхваляем подвиги и страдания твоя, с любовию вопиюще ти: Радуйся, Феоктисте священномучениче, о душах наших теплый молитвениче.

Икос 1

Ангелов Творец и всея твари Создатель во дни смут и нестроений церковных избра тя, священномучениче Феоктисте, проповедника Православия и служителя Церкви Христовы. Мы же, славяще подвиги и труды твоя, вопием ти умиленно таковая:

Радуйся, Богом избранный и освященный;

Радуйся, в вере Правой утвержденный.

Радуйся, мученическим венцем увенчанный;

Радуйся, кротостию и смирением украшенный.

Радуйся, земли Черниговския молитвенниче;

Радуйся, истины Христовы проповедниче.

Радуйся, Феоктисте священномучениче, о душах наших теплый молитвениче.

Кондак 2

Видя Спас душ наших Христос благочестивое житие твое, священномучениче Феоктисте, дарова ти дар разумения и учительства слова Божия, да утвердиши в вере люди христианския, да вси единомысленно с тобою вопиют Богу: Аллилуиа.

Икос 2

Разум Всевышний приосени тя, всехвальный пастырю наш Феоктисте, егда избра тебе Господь во пресвитера, во еже пещися ти о агнцех Божиих, да ни един убо от них погибнет. Тако и ныне, во обителех небесных пребываяй, наставник неусыпный буди нам, зовущих ти из глубины сердечныя:

Радуйся, благодатию Божией очищенный;

Радуйся, сиянием разума духовнаго украшенный.

Радуйся, житием твоим люди удививый;

Радуйся, словом твоим к покаянию наставивый.

Радуйся, яко тобою неверие искоренися;

Радуйся, яко тобою слово Божие утвердися.

Радуйся, Феоктисте священномучениче, о душах наших теплый молитвениче.

Кондак 3

Силою свыше облече тя Дух Святый, егда пастве твоей во иерея поставлен был еси. Ты же, яко добрый пастырь, словесныя овцы во дворы Господни приводя, укрепляющему тя Иисусу воспевал еси: Аллилуиа.

Икос 3

Имеяй разум, силою Божиею просвещенный, священномучениче Феоктисте, небоязненно проповедовал еси пастве своей славную истину Христову и за сие от гонителей темничное заключение претерпел еси. Мы же, восхваляя страдания твоя, умильно вопием ти сице:

Радуйся, хулы и напасти от гонителей претерпевый;

Радуйся, за проповедание слова Божия в темницу заключенный.

Радуйся, благим супружеством образ честнаго брака явивый;

Радуйся, в супружнице добраго помощника от Бога получивый.

Радуйся, храма Пресвятыя Троицы верный служителю;

Радуйся, непрестанныя молитвы усердный совершителю.

Радуйся, Феоктисте священномучениче, о душах наших теплый молитвениче.

Кондак 4

Бури гонений и злоречий не убоялся еси, страстотерпче святый Феоктисте, но паче на Христа надежду всю возлагал еси и к Нему непрестанно в молитве взывал еси, призывая и нас быти причастниками горняго Царствия, идеже ныне пребываеши, поя Богу: Аллилуиа.

Икос 4

Слышаша людие православнии крепость и твердость веры твоея, отче треблаженне, яко не устрашился еси правителей безбожных, но крест мучения приимше, ко страстем всерадостно шествовал еси. Научи и нас друг друга тяготы носити, воспевающия и прославляющия тя сице:

Радуйся, молитвенниче скорый и теплый;

Радуйся, предстателю наш благий и верный.

Радуйся, светильниче, пред Богом горящий;

Радуйся, за правду и истину крепко стоящий.

Радуйся, Православныя веры насадителю;

Радуйся, благодати Христовыя носителю.

Радуйся, Феоктисте священномучениче, о душах наших теплый молитвениче.

Кондак 5

Боготечная звезда явился еси, священномучениче Феоктисте, яко Божественною благодатию, от Бога ти данною, люди, призывающия тя, на спасительныя подвиги укрепляеши, память смертную подаеши и вразумляеши всех пети песнь: Аллилуиа.

Икос 5

Видяще яко нечестивии тщатся разорити храмы и олтари Господни, священнослужители и верныя чада церковныя избивающе, поревновал еси о Вседержителе и явился еси яко светильник, правдою пламенеющий. Темже, подвигам твоим дивящеся, зовем ти сице:

Радуйся, венца Христова носителю;

Радуйся, духов злобы победителю.

Радуйся, правило веры благочестивыя;

Радуйся, образе кротости духовныя.

Радуйся, обиженных утешение;

Радуйся, путешествующих охранение.

Радуйся, Феоктисте священномучениче, о душах наших теплый молитвениче.

Кондак 6

Проповедник не словом точию, но и делом явился еси, славный священномучениче Феоктисте, егда не терпящия безбоязненнаго служения твоего богоборцы во узы тя заключаху. Ты же, на Господа все свое упование возложив, сладко воспевал еси Ему: Аллилуиа.

Икос 6

Возсиял еси, богомудре Феоктисте, яко светлая звезда на небе церковнем, верным путь ко Христу озаряющи и в истинной вере утверждающи, всем же вся полезная всегда дарующи. Сего ради и мы к тебе присно прибегаем и благодарственно вопием сице:

Радуйся, веры Христовы учителю;

Радуйся, храмов Божиих защитителю.

Радуйся, слова Божия добрый сеятелю;

Радуйся, гордых и злонравных смирителю.

Радуйся, яко твоими молитвами спасаемся;

Радуйся, яко твоими наставленьми поучаемся.

Радуйся, Феоктисте священномучениче, о душах наших теплый молитвениче.

Кондак 7

Хотяй веру Православную в веси Лосиновке утвердити, святый отче наш Феоктисте, крест Христов с кротостью восприял еси, укрепляя чад твоих в добродетелех христианских. Мы же, ныне молим тя, угодниче Христов, испроси и нам сия боголюбезные добродетели; да и мы чистым сердцем воспоем Спасителю Нашему: Аллилуиа.

Икос 7

Дивное показал еси долготерпение, священномучениче Феоктисте, Христову долготерпению подражая, егда в годину тяжких испытаний паству твою окормлял еси, будучи ей щитом и оградою от всякия напасти вражия. Мы же, притекая к тебе, воздаем ти похвалы сия:

Радуйся, яко путь в Царствие Небесное обрел еси;

Радуйся, яко сим путем невозвратно шествовал еси.

Радуйся, Божиим определением во иерея поставленный;

Радуйся, мученичеством в нем прославленный.

Радуйся, книжным научением слова Божия себе питавый;

Радуйся, службы Божии неленостно исправляяй.

Радуйся, Феоктисте священномучениче, о душах наших теплый молитвениче.

Кондак 8

Странное чудо видим пречудное житие твое, новомучениче Феоктисте, яко не о славе, ни о преходящих благах земных помышлял еси; егда нечестивых советы, о еже оставити ти служение твое пастырское отвергл еси. Мы же, благочестие и мудрость воспевающее, Всеблагого Господа Нашего, умудрившего тя тако, славим вопиюще Ему о тебе: Аллилуиа.

Икос 8

Всем сердцем возлюбил еси Бога, священномучениче Феоктисте, и мужественно Христа исповедав, множество мучений претерпел еси и в темницу заключен быв, дух свой Господу предал еси. Мы же, восхваляюще страдания твоя, за Христа претерпенная, вопием ти умиленно таковая:

Радуйся, мучениче, Богом прославленный;

Радуйся, исповедниче святый, верными воспеваемый.

Радуйся, поборниче неустрашимый;

Радуйся, страдальче непобедимый.

Радуйся, за Христа до крови пострадавый;

Радуйся, от Него венцем нетленным увенчанный.

Радуйся, Феоктисте священномучениче, о душах наших теплый молитвениче.

Кондак 9

Все упование на Христа возложив, страстотерпче Феоктисте, егда во узах темничных от гонителей веры Православия оскорбления, надругания и биения приял еси. Мы же, Господа Нашего, озарившего тя светом Своим во дни испытаний твоих, славим и вопием Ему: Аллилуиа.

Икос 9

Ветия многовещанные не довлеют по достоянию восхвалити праведное житие и мученическую кончину твою, всехвальне Феоктисте; обаче же мы, любовию к тебе подвизаеми и надеждою на предстательство твое окрыляеми, со смирением и верою таковые похвалы приносим ти:

Радуйся, благих прошений исполнителю;

Радуйся, злых намерений искоренителю.

Радуйся, скорый помощниче тя призывающих;

Радуйся, милостивый заступниче тя почитающих.

Радуйся, благодатию Божиею бесы низлагаяй;

Радуйся, вражия козни силою Христовою расторгаяй.

Радуйся, Феоктисте священномучениче, о душах наших теплый молитвениче.

Кондак 10

Спастися хотяще, мы, грешнии, к тебе прибегаем, Феоктисте священномучениче, и почитающе честный образ твой, усердно молим тя: помози нам, немощным, утоли скорбь нашу и на путь правый настави нас, заблуждающихся, да спасеннии твоими молитвами, хвалебными гласы зовем: Аллилуиа.

Икос 10

Стена крепкая, козньми врага неодоленная, пребыл еси до конца, всехвальный священномучениче Феоктисте, егда тя злочествии богоотступницы в стране Казахстанстей лютей смерти предаша. Темже и мы, благоговейно поминающее страдания и подвиги твоя, с любовию зовем ти:

Радуйся, храмов Божиих заступниче и покровителю;

Радуйся, святаго олтаря Господня усердный служителю.

Радуйся, от глада духовнаго всех нас избавляяй;

Радуйся, грешников ко исправлению направляй.

Радуйся, веры и любве учителю;

Радуйся, страха Божия насадителю.

Радуйся, Феоктисте священномучениче, о душах наших теплый молитвениче.

Кондак 11

Пение молебное принеси Пресвятей Троице, святый отче Феоктисте, о почитающих святую память твою, и усердно моли о еже избавитися нам от греховных падений, диавольских козней и вечнаго мучения, да непрестанно во умилении зовем Богу: Аллилуиа.

 

Икос 11

Светлостию чудес твоих, угодниче Божий Феоктисте, всю страну нашу просвещаеши, и верных во истине укрепляеши, и на враги победы даруеши. Мы же, воспоминая мученическую кончину твою, со умилением зовем ти:

Радуйся, края Черниговскаго славо и украшение;

Радуйся, земли Нежинския крепкая защито и ограждение.

Радуйся, к сонму святых Христом сопричтенный;

Радуйся, во граде Небеснем Им возвеличенный.

Радуйся, яко благодатию Божиею верных просвещаеши;

Радуйся, яко поученьми своими заблудших обращаеши.

Радуйся, Феоктисте священномучениче, о душах наших теплый молитвениче.

Кондак 12

Благодать и милость испроси нам у Господа, страстотерпче святый Феоктисте, и молитвами твоими настави нас на путь спасения, да тако с тобою и со всеми святыми во веки воспоем Спасающему нас Богу: Аллилуиа.

Икос 12

Поюще подвиги и страдания твоя, отче наш Феоктисте прославляем мученическую кончину твою, еюже страдания Сына Божия в телеси своем прославил еси, Мы же с кротостию и смирением приемлем наставления твоя и, подражая твоему человеколюбию, с любовию воспеваем тебе:

Радуйся, предстателю наш скорый и теплый;

Радуйся, ходатаю о нас пред Богом неусыпный.

Радуйся, болящих целителю;

Радуйся, скорбящих утешителю.

Радуйся, к покаянию нас призываяй;

Радуйся, на мытарствах нам помогаяй.

Радуйся, Феоктисте священномучениче, о душах наших теплый молитвениче.

Кондак 13

О преславный угодниче Христов, отче наш Феоктисте. Услыши сие малое моление наше и испроси нам у Милосерднаго Бога в вере Православней укрепление, в любви христианстей преуспеяние и грехов наших прощение, да сподобимся с тобою и со всеми святыми воспевати Богу: Аллилуиа.

(Этот кондак читается трижды, затем икос 1 и кондак 1)

МОЛИТВА
священномученику Феоктисту

О избранниче и угодниче Христов, священномучениче Феоктисте, Церкве Христовыя столпе непоколебимый, земли Черниговския красный плод и благое прозябение, сродников твоих предстателю и наставниче! Во время гонения безбожнаго от сокровищницы души твоея спасительное исповедание Православныя веры изнесл еси, и людем верным пастырь добрый явился еси, душу твою за Христа и Его овцы полагая и лютыя волки далече отгоняя. Ныне убо призри на нас, недостойных чад твоих, умиленною душею и сокрушенным сердцем тя призывающих. Умоли Господа Бога, да простит согрешения наша и избавит от адовых уз и вечнаго мучения. Утверди нас в вере святой, научи нас всегда творити волю Божию и хранити заповеди церковныя. Буди пастырем нашим – правило веры, воином – вождь духовный, болящим – врач изрядный, печальным – утешитель, гонимым – заступник, юным – наставник, всем же благосердый отец и теплый молитвенник, яко да молитвами твоими соблюдется в Православии страна наша и непрестанно славится в ней имя Пресвятыя Троицы, Отца и Сына и Святаго Духа во веки веков. Аминь.

(283)